hh
موبايلات

بلاك بيري بولد 9900

المميزات: لوحة الزراير ممتازة، الشاشة نقية و ألوانها حلوة، نظام التشغيل سريع و سهل الاستعمال، و طبعًا الـBBM من نقط القوة و المعالج قوي و سريع.

العيوب: الشاشة تعتبر صغيرة إلى حد ما بالنسبة لباقي الهواتف الذكية ، الكاميرا جودتها مش مرضية، ونظام التشغيل مش بيدعم الفلاش.

الخلاصة: البلاكبيري بولد 9900 هيبسطك جدًا لو أنت من محبي البلاكبيري و استعملت تليفون بلاكبيري قبل كده، لأنك هتلاقي فيه كل المواصفات اللي بتحبها مع بعض التحديثات كمان، و هيكون سهل التعامل بالنسبة لك. أما لو أنت مالكش قوي في البلاكبيري و أول مرة تتعامل معاه، غالبًا البولد 9900 بالنسبة لك هيكون أقل إغراءً من تليفونات تانية بنفس السعر، زي السامسونج جلاكسي إس 2 أو أيفون 4 إس.

تقييم بلاكبيري بولد 9900

 

الشكل

البلاكبيري بولد 9900 شكله مش فارق أوي عن شكل البلاكبيري التقليدي. كعادة البلاكبيري، البولد 9900 شكله بسيط وشيك، بالإضافة للشريط المعدني الفضي المحيط بالتليفون و اللي بيخلي شكله أنيق جدًا. البلاكبيري بولد 9900 ماسك نفسه و مريح في الإيد، لكن رغم كده وزنه خفيف و يعتبر أرفع من أي جهاز بولد نزل قبل كده. الشاشة واضحة ، و لوحة الزراير كالعادة شكلها حلو، خصوصًا مع عرض التليفون.

الإمكانيات

المعالج بتاع البلاكبيري بولد 9900 بيشتغل بقوة 1.2 جيجاهرتز، على عكس موديلات البولد القديمة اللي ماكانش البروسيسور بتاعها بيعدي الـ 1 جيجاهرتز. رغم أن المعالج إحادى النواة ومش ثنائي النواة زي السامسونج جلاكسي إس 2 مثلاً، إلا أن التليفون سريع و متجاوب جدًا. و ده ممكن يرجع كمان لنظام التشغيل الجديد المجهز بيه البولد 9900، وهو البلاكبيري 7. مع نظام التشغيل ده، هتلاقي الاستخدام العادي للتليفون إلى جانب تصفح الإنترنت و استعمال التطبيقات سريع و انسيابي جدًا. طبعًا من أهم إمكانيات أي بلاكبيري خصائص الإيميل و المراسلات اللي فيه، و قدرته على الربط بين تطبيقات التواصل الإجتماعي المختلفة. البولد 9900 كمان فيه النسخة الكاملة من تطبيق دوكيومنتس تو جو Documents to Go اللي بيسمح لك تعدل في أي ملف من برامج أوفيس على التليفون، و ده بيكون مفيد جدًا لو بتستعمل موبايلك في شغل. ذاكرة البولد 9900 الداخلية 8 جبجا، و بيسمح باستخدام كارت ذاكرة إضافي الحد الأقصى لحجمه 32 جيجا، و ده بيسيب لك مساحة كبيرة لتخزين أي صور وأو أغاني أو أفلام إنت عايزها. الشاشة اللمس بتاعة البولد 9900  متجاوبة جدًا، بالإضافة للوحة زراير هايلة بتسهل عليك الكتابة لو إنت مش من هواة الكتابة باللمس. البولد 9900  مُجهز بكاميرا 5 ميجابيكسل، و كاميرا فيديو بتصور بجودة 720 بيكسل.

الأداء

المعالج الأقوى و نظام التشغيل الجديد بيخلوا البلاكبيري بولد 9900 سريع بصفة عامة، و التصفح على البولد 9900 سلس و عملي، لكن برضه فيه تطبيقات ثقيلة على المشغل البلاكبيري 7 و تحميلها بيكون البطيء، على عكس الأندرويد مثلاً. الشاشة في البولد 9900 النقاء بتاعها أعلى كتير من البولد 9780، لكن رغم دقة صورتها و نقاء ألوانها، إلا أنها تعتبر صغيرة لأنها مش واخدة طول التليفون كله بسبب لوحة الزراير، فده بيخليها مش مناسبة أوي للفرجة على فيديوهات أو أفلام. مشغل الموسيقى في البولد 9900 أدق من الموديلات اللي قبله، و الصوت بأعلى جودة ممكنة. وجود  البي بي أم و لوحة زراير مميزة زي بتاعة البولد 9900 في تليفون واحد بيخليه مناسب جدًا لمحبي التشات أو المراسلات السريعة. الجدير بالذكر أن الكاميرا بتصور حلو جدًا لو الإضاءة كويسة، لكن الـتباين بين الألوان مش بيكون حاد كفاية، و التصوير في الضلمة مش بيكون سهل، خصوصًا أن الـفلاش بيطلع الصور شكلها غريب  و إضاءته بهتانة، لكن كاميرا الفيديو ممتازة و بتصور بجودة أعلى من أي تليفون بلاكبيري تاني. متجر بلاكبيري للبرامج بيوفر مجموعة كبيرة من التطبيقات، لكن لاتقارن من حيث التنوع بالتطبيقات المتوفرة على متجر أبل أة الأندرويد ، ده غير أن أغلبها غالي. عُمر البطارية حوالي  6 ساعات و نص، و ده بالنسبة لبعض أجهزة البلاكبيري التانية يعتبر قليل شوية، لأن معناه أنك هتضطر تشحنه مرة في اليوم، بينما فيه موديلات تانية كان ممكن تشحنها كل يومين بس، و ده لأن البروسيسور القوي في البولد 9900 بيسحب من البطارية.

الخلاصة

البلاكبيري بولد 9900 هيبسطك جدًا لو أنت من محبي البلاكبيري و استعملت تليفون بلاكبيري قبل كده، لأنك هتلاقي فيه كل المواصفات اللي بتحبها مع بعض التحديثات كمان، و هيكون سهل التعامل بالنسبة لك. أما لو أنت مالكش قوي في البلاكبيري و أول مرة تتعامل معاه، غالبًا البولد 9900 بالنسبة لك هيكون أقل إغراءً من تليفونات تانية بنفس السعر، زي السامسونج جلاكسي إس 2 أو أيفون 4 إس.

ريفيوزات متعلقة

 

التعليقات

تعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق
إغلاق